မောင်ချောနွယ် ကဗျာများ

မောင်ချောနွယ်အတု (ကဗျာ)

မောင်ချောနွယ်အတု
မောင်ချောနွယ်

မောင်ချောနွယ်အတုက ပြောတယ်
သန်းလေးဆယ်အတွက်
ထွန်ယက်ခဲ့ပါတယ်တဲ့
ကိုယ့်အတ္တမှ ကိုယ်မသေချာတဲ့
မောင်ချောနွယ်အတုကလေ …
သူတစ်ပါးချမ်းသာရေးအတွက် ပါဝင်ခဲ့ပါတယ်တဲ့
မောင်ချောနွယ်အတုကလေ …
မျက်လှည့်ဆရာရဲ့ ‘ဘင်’ ကိုမှ ၀ယ်မယ်တဲ့
မောင်ချောနွယ်အတုကလေ …
တစ်ဖက်သားကို ဒုက္ခပေးပုံပေါ့
ခမျာမှာ ဒီဘင်လေးနဲ့ လူစုရရှာတာကို
ဒီဘင်ကိုမှ ၀ယ်ဖို့ကြိုးစားနေလေရဲ့ …။

မောင်ချောနွယ်အတုက ပြောတယ်
အလမ္မာယ်ဆရာရဲ့ မြွေကိုဝယ်မယ်တဲ့
ဒီမြွေလေး ပြပြပြီးစားရတဲ့ တစ်ဖက်သားကိုမှလေ …။

မောင်ချောနွယ်အတုက ပြောတယ်
သူများတိုက်တဲ့ ရေခဲစိမ်ဘီယာကို
သူ့ခွက်ထဲ အရင်ထည့်ပေး
သူ့ကိုအရင်သောက်စေခြင်းနဲ့
မြှောက်စားရမယ်တဲ့ …။

မောင်ချောနွယ်အတုကပြောတယ်
ငါတို့ဟာ
အေသင်မြို့သားတစ်ဦးလို တွေးခေါ်ရမယ်
ဆိုကရေးတီး မဟုတ်ခဲ့တာ
သေချာဖို့လိုတယ်တဲ့ …။

မောင်ချောနွယ်အတုကပြောတယ်
ဂိုးလ်ဒင်းဂိတ်တံတားကြီးပေါ်ကနေ
ကမ္ဘာလောကကြီးကို ရှုမျှော်ကြည့်ရမယ်တဲ့ …။

မောင်ချောနွယ်အတုကပြောတယ်
မက်ဒေါနားလည်း ဒုလ္လဘတစ်ခုနဲ့ပဲ
ဂေါ်ဘာချော့လည်း ဒုလ္လဘတစ်ခုနဲ့ပဲ
လန်ဒန် ဒေါင်းနင်းသားလည်း ဒုလ္လဘတစ်ခုနဲ့ပဲ
တောမရွာသားလည်း ဒုလ္လဘတစ်ခုနဲ့ပဲ
လူ့ဘ၀လောက် မှားယွင်းခွင့်ရှိတာ
ဘယ်ရှိမလဲတဲ့ …
လူညံ့ရွေးတဲ့နေရာမှာ တော်ရမယ်လို့
မောင်ချောနွယ်အတုက ပြောတယ်။

မောင်ချောနွယ်အတုဟာ
သူ့ဇနီးသည်
ညီမလေး မမမြင့်မှာ
(တကယ်တော့
ညီမလေးပါပဲ
သူ့ကို ကဗျာဆရာဖြစ်စေခဲ့သမို့
ညီမလေး မမမြင့်လို့
သူက ဂုဏ်ရည်မြှင့်ခေါ်ခဲ့တာပါ)
နှုတ်ခဲ့ရတဲ့ သွားတစ်ချောင်း
ပြန်စိုက်ပေးရဦးမယ်လို့
နေ့စဉ်နေ့စဉ် ထိသိနေရသူ
သတိတရ အားစိုက်နေရသူ
အချစ်ကို
သွားတစ်ချောင်းအပေါ် ပုံနေရသူမျှသာ
ဖြစ်လေရဲ့။

တကယ်တော့
မောင်ချောနွယ်အတုဟာ လူဖြစ်ပြီး
မောင်ချောနွယ်အစစ်ဟာ
လူမဟုတ်ဘူးလို့ မပြောလိုက်ကြပါနဲ့။ ။

မောင်ချောနွယ်




Thursday, August 28, 2008
သက်မဲ့သက်သေ (ကဗျာ)

သက်မဲ့သက်သေ
(သို့ … ဂျွန်)
မောင်ချောနွယ်

အသံတွေ ချေး(ဂျီး)တက်ခဲ့
တို့အသက်ရှူသံတွေ အငွေ့ပျံ
ကိုယ့်အသက်ကိုပဲ ခွက်နဲ့ ချင့်သောက်ရ
လေပျို့လေအန် လေဆန်နာနဲ့ ဆိုက်ကပ်ရ
ဆိပ်ကမ်းမရှိတဲ့ အရပ်မှာလေ
တို့ခန္ဓာကိုယ်တွေကို ကျုံ့ပြီးရင်း ကျုံ့ပေးရ
တို့ခန္ဓာကိုယ်တွေကို ကျစ်ပြီးရင်း ကျစ်ပေးရ
ဒါတွေကို မင်းမေ့ခဲ့လို့ပဲ ဂျွန်ရေ
မင်းဆီ ဒီစာသ၀ဏ် ပါးလိုက်ပါရဲ့။

သူငယ်ချင်း ဂျွန်ရေ …
သက်ငါးဆယ်လမ်းထိပ်မှာ
သိန်းငါးဆယ်ကို ခုထိုင်ပြီး
ပေါ့ပါးစွာ ငိုညည်းနိုင်သူရေ
မင်းကျန်းမာရေးကောင်းသွားအောင်ပေါ့
မာစီးဒီးကားကို စီးပါ
ဝါရှင်တန် ပန်းသီးကို စားပါ
ဘေဘာလီဟေးလ်မှာ အိမ်ဝယ်ပါ
ပြီးတော့ လမ်းကို မင်းနာမည်ပေးပါ
ဆင်သားရေနဲ့ ချုပ်ထားတဲ့ ဖိနပ်ကို စီးပါ
ဗန်ဂိုးနဲ့ ဂျွန်လင်နွန်ဆီ ဖုန်းဆက်ပါ
ဓားကို ဘေးမှာထားပြီး ဟိုးမားရဲ့ကဗျာကို ဖတ်ပါ
လတ်ဆတ်မှု အရှင်လတ်လတ်ကို ၀တ်ဆင်ပါ
ညကြီးတွေပေါ် လမ်းလျှောက်ပါ
ပြင်သစ်က ကက်ကိုဘိန်းရဲ့ ဂူမှာ
နှင်းဆီပန်းနဲ့ အရက်ပုလင်း လက်ဆောင်ပေးပါ
ဆူးတွေကို ဒဏ်ရာနဲ့ လိုက်ရှာပါ
ငါးဖမ်းလှေလေးပေါ်က တေးသံကို နားဆင်ပါ။

ဂျွန်ရေ …
ရပ်နေတဲ့ နာရီကြီးကို ကြည့်မနေပါနဲ့တော့
ဘေဘီကျူး မီးဖိုကြီးပေါ်မှာ
မင်းအသားတွေ မင်းကင်ပြီး
မြိန်ရေယှက်ရေ စားပါတော့ ။ ။

(ကျွန်ုပ်ချစ်သော ကဗျာပရိသတ်များ ဤကဗျာအား ကူးယူဖော်ပြ ရွတ်ဆိုနိုင်ပါကြောင်း …)

မောင်ချောနွယ်
၁၉၉၈ ခုနှစ်၊ ဖေဖော်ဝါရီလ၊ ၁၅ ရက်နေ့

ဤကဗျာနှင့် စပ်လျဉ်း၍ အမှတ်ရချက် ။ ။ ရုပ်ရှင်တေးကဗျာမဂ္ဂဇင်းတွင် “ဤကဗျာအား ခွင့်မတောင်းဘဲ မည်သူမျှ ကူးယူဖော်ပြခွင့်မရှိ” ဟူသည့်သဘော အောက်ခြေမှတ်စုပါ ကဗျာဆရာ သုခမိန်လှိုင်၏ ကဗျာတစ် ပုဒ် ဖတ်ရှုခဲ့ရပါသည်။ ထို့နောက် နောက်လထုတ် ရုပ်ရှင်တေးကဗျာမဂ္ဂဇင်းတွင် ဆရာမောင်ချောနွယ်၏ ဤက ဗျာကို ဖတ်ရှုခဲ့ရခြင်းဖြစ်ပါသည်။ ဤကဗျာဖော်ပြပြီး နောက်တစ်လတွင် ကဗျာဆရာ အောင်ဝေး၏ “မူပိုင်-ခင်ဆွေရီ” ဆိုသည့် အောက်ခြေမှတ်စုပါ ကဗျာတစ်ပုဒ်ကို ဖတ်ရပြန်ပါသည်။ ဤကဗျာသုံးပုဒ် ဖတ်ပြီးနောက် သရော်စာ ရေးသားသူ စာရေးဆရာ ဂျက်ကွမ်းခြံကုန်းက ကျနော်၏ မြားနတ်မောင်မဂ္ဂဇင်းတွင် “စတန့်မင်း သားတွေလို ဒိုင်ဗင်ထိုးဖို့မလို” ဟူသည့် ခေါင်းစီးနှင့် သရော်စာတစ်ပုဒ် ရေးသားခဲ့သည်ကို အမှတ်ရနေမိပါ သည်။ ဆရာသုခမိန်လှိုင်နှင့် ဆရာအောင်ဝေးတို့၏ ကဗျာခေါင်းစီးများကို မမှတ်မိတော့ပါ။

ဒေါက်တာလွဏ်းဆွေ