မောင်ချောနွယ် ကဗျာများ

Tuesday, September 2, 2008
သစ္စာပန်းများနဲ့ မေလ (ကဗျာ)

သစ္စာပန်းများနဲ့ မေလ
မောင်ချောနွယ်

တစ်ဘ၀ ကဗျာဆရာ
မဟုတ်ခဲ့တာ သေချာပြီ။
ဘာတစ်ခုမှ မရှိတော့တဲ့ မေလမှာ
နောက်ထပ် ဘာမဆို ပေးလိုက်ရပြန်တဲ့ မေလမှာ
အဆင်မပြေမှုတွေ
အစီအစဉ်ကျနလွန်းတဲ့ မေလမှာ
အလကားရတဲ့ ညနေခင်းကတောင်
မထေမဲ့မြင်ပြုခံရတဲ့ မေလမှာ
ဒုက္ခတွေ အဆုပ်လိုက် အဆုပ်လိုက်
ပွင့်အားကောင်းတဲ့ မေလမှာ
အားကြီးဖုန်ထတဲ့ လေပူထဲ
အနှံ့ပြားစီပွချင်တိုင်း ပွနေ လွင့်နေတဲ့
လဲမှို့တွေလို မေလမှာ
အဆုပ်ပွပွ ညတွေရသူ မေလမှာ
သလိပ်ဖတ်လို
လမင်းကြီးကို မြင်မိသူ မေလမှာ
အပ်တစ်ဖျားထောက်စရာ မလပ်အောင်ဘဲ
ဒဏ်ရာအပြည့်ခန္ဓာနဲ့ မေလမှာ
မေလပေါင်းများစွာ ပြန်လည်စုစည်းမိသူ မေလမှာ
အချိန်မှန်အတွင်း
လူနာအဖြစ် တင်ပို့ခံရသူ မေလမှာ
အပ်ဖျားတစ်ခုပေါ် ရောက်ခဲ့ပေမယ့်လည်း
ပြန်လည်ကျန်းမာခွင့်မရှိတော့တဲ့ မေလမှာ
အသက်ရှင်တစ်ချက် မရှင်တစ်ချက် မေလမှာ
မေလက မေလကို
အသေသာ ပြန်ရလိုက်တဲ့ မေလမှာပေါ့။
ချော်ရည်ပူ ကျိချွဲချွဲ နေ့လည်စာတွေ
ငါးမန်းတောင် ဆူးကြမ်းပြင်တွေ
ဆာတေးရီးယန်း မြက်ပင်ရှည်လက်တွေ
လူအဖြစ် သရုပ်ဆောင်ရသူ မေလ
လောကဘရိတ်သွားပေါ်
တွားသွားသတ္တ၀ါဖြစ်ရသူ မေလ
တစ်နေ့ထဲ
သင်္ဘောအကြိမ်တစ်ရာ မှောက်ရတဲ့ မေလ
တောအလှူတစ်ခုမှာ
လူချင်းတိုက်မိလို့
မတော်တဆ ပန်းကန်ထဲ ဖိတ်ကျတဲ့
အသားတုံး အကျလေးတောင်မှ မစားရသူ မေလ
မနက်လင်းရင်
ကိုယ့်အသုဘကိုချပြီး
မြို့ကြီးထဲ ထွက်ခွာသွားသူ မေလ
သူတစ်ပါးရဲ့ အသုဘမှာ
အငှားလိုက်ငိုရတဲ့ ငိုချင်းသည်မ မေလ
သူ့ကလေးတွေကို မုန့်ဝယ်မကျွေးနိုင်လို့
သူ့လက်မောင်းသွေးတွေ ဖောက်တိုက်ရရှာသူ မေလ
နေ့ပြန်တိုးတွေ ၀က်အူစုပ်ခံရသူ မေလ
ဘ၀ရဲ့ ဘက်ထရီအိုးတွေ
တော်တော်များများ ဖျက်ဆီးခံရသူ မေလ
အင်မတန် အကြွေရဲတဲ့ ငုပင်တွေအပေါ်
သူ့အသက်ရှူငွေ့ကလေး
သွားတင်ထားမိတဲ့ မေလပေါ့။

မေလထဲကနေ
အသည်းနှလုံးကို ဆတ်ကနဲ ဆွဲထုတ်ပြီး
ဖဲသမားတစ်ယောက် ဖဲချပ်ကိုဆွဲထုတ်
လက်ဝါးထဲထည့်
ဖျန်းခနဲ ရိုက်ချလိုက်သလိုမျိုး
ရိုက်ချကြည့်လိုက်တဲ့အခါ
မေလရာသီဟန်ဆောင်နေတဲ့ မေလကိုသာ
တွေ့ရတဲ့ မေလပေါ့၊
ဖြူတစ်ကောင်လို ခါချလိုက်လို့
ဖြူဆူးတွေ အကုန်ကွာကျသွားမယ့်
ဖြူဘ၀ရောက်ပြီ။

မေလရာ
ခါချလိုက်ပါဆိုရင်တောင်
အကြိမ် ၂ သိန်း ၄ သောင်းခါမှ
တစ်ကြိမ်သာ သူ့ဒုက္ခဖြူဆူးများ ကွာကျနိုင်မယ့် မေလပေါ့။ ။

မောင်ချောနွယ်

အပြည့်အစုံသို့...

ပြန်ခေါက်ထားပါ...

Posted by ဒေါက်တာလွဏ်းဆွေ at 1:51 PM 0 comments

Labels: မောင်ချောနွယ်ကဗျာ

Monday, September 1, 2008
မောင်ချောနွယ်ဆန်သွားသောနေ့များ (ကဗျာ)

မောင်ချောနွယ်ဆန်သွားသောနေ့များ
မောင်ချောနွယ်

အယူမှန်သူအတွက် အယူခံမလို
ကမ္ဘာကြီးအတွက် ညတိုင်းသီချင်းတွေဆိုခဲ့ပါတယ်။
ထောင့်ချိုးများလင်းဖို့ ဆုတောင်းရင်း
မျဉ်းဖြောင့်တစ်ကြောင်းလို နေခဲ့တယ်။

အပင်ကိုချစ်လို့
အမြစ်ကို ရေစင်လောင်းရင်း
အကြမ်းဆုံးမြစ်ကို ဆန်ခဲ့တယ်။

အလိုလိုကြွေကျတဲ့ သစ်သီးများသာ စားသုံးရင်း
ဟောဒီကမ္ဘာလောကရဲ့ ချောင်လေးတစ်ခုမှာ
အရေးမပါတဲ့ ငှက်ကလေးတစ်ကောင်လို
ငါ့အနုပညာနဲ့သာ ငါနေထိုင်ရင်း
အလင်းဓာတ်ကို မြတ်နိုးခဲ့ပါတယ်။

ရေဆူအမှတ်မှာ မီးခိုးအူအူနဲ့ ဆန်တက်မြဲ
ဘယ်လက်ဝှေ့ပွဲမှ မထိုးခဲ့ပါ။
ဘယ်ပြေးပွဲပြိုင်ပွဲမှလည်း မပါဝင်ခဲ့ပါ။

ခု အသက် ၅၃ နှစ်ထဲ ရောက်ချေပေါ့
နာတာရှည်ရောဂါနဲ့
သူများလက်ဆောင်ပေးတဲ့ ပန်းသီးလေး
ခွဲမစားဖြစ်သေးပါ။ ။

မောင်ချောနွယ်

အပြည့်အစုံသို့...

ပြန်ခေါက်ထားပါ...

Posted by ဒေါက်တာလွဏ်းဆွေ at 12:12 PM 0 comments

Labels: မောင်ချောနွယ်ကဗျာ

Sunday, August 31, 2008
ညီမလေး မမမြင့် (ကဗျာ)

ညီမလေး မမမြင့်
မောင်ချောနွယ်

(က)

မြောက်ကျွန်းသူ အတုလကာရီရဲ့
တစ်စလည်ဝင် ထမင်းအိုးလေးဟာ
ရဟန္တာ အပါး ၅၀၀ ကို
ဆွမ်းကပ်လှူနိုင်သတဲ့ကွ …။

ညီမလေး မမမြင့်ရဲ့
ရွှေသားသံယောဇဉ်ကလည်း
ကိုယ့်ဘ၀တစ်ခုလုံးကို
ကျန်းမာဝေဆာအောင်
ကဗျာဆရာဖြစ်အောင်
ဖြည့်စွမ်းပေးနိုင်ခဲ့ပါတယ်။

ညီမလေး မမမြင့်ရေ …
မမြဲတဲ့ အနိစ္စတရားက မြဲလွန်း
တို့တွေ မောင်နှမလို နေကြမယ်ကွယ်။

သူငယ်ချင်း သုခမိန်ရေ …
မင်းက ပဏ္ဍိတလမ်းမှာ နေတယ်
မင်းက သုခမိန်လမ်းမှာ နေတယ်ဆိုတော့
ငါ့အတွက် အင်နာဗွန်စီရယ်
အသည်းဆေး လစ်ဗိုလင်ရယ်ဝယ်ဖို့
မြန်မာငွေကျပ်တစ်သောင်း အမြန်ပေးပါကွယ် …။

ညီလေး မောင်ပြည့်မင်းရေ …
မင်းရဲ့ နောက်ဆုံးဒြပ်စင်ထဲက ဇာတ်လိုက်ဟာ ငါပေါ့ကွာ
နောက်ဆုံးလက်ကျန် အရက်တစ်ခွက်ကို ငြင်းဆို
သီချင်းဆိုပြီး ပြန်ခဲ့တယ်
မင်းဟာ နာမည်နဲ့လိုက်အောင် ပြည့်ပြီး
နာမည်နဲ့လိုက်အောင် ပြည့်သူပါကွာ
အခုတော့ ဥက္ကလာဟိုးမားမှာနော်။

ငွေကြာယံက ဇိမ်ခံတိုက်ကြီးနဲ့
သူငယ်ချင်း ကိုကျော်လှိုင်ရေ …
ကဗျာအင်ဂျင်နီယာရင်းမှာ
ခင်ဗျားက
ကမ္ဘာခြားရဲ့ အသင်းဝင်တစ်ဦးပါ။

ငါ့တူလေး လူဆန်းရေ …
မင်းကတော့
မော်တော်ဆိုင်ကယ်လေးတစ်စီး စုန်ဆန်လို့
ပဲခူးနဲ့ ပုဂံ စုန်ချည်ဆန်ချည်
ဗျတ္တရဲ့ ပန်းဆက်လမ်းမှာ
မင်းပန်းတွေ ဘာတွေဆက်ခဲ့ရဲ့လား
Mount ပုပ္ပါးရဲ့ နေ၀င်ချိန်တွေ
သိပ်လှတာပဲကွယ်။

တောင်ဆီမှာ မိုးတွေညို့ရင်
မောင်ဖီလာရယ် ငါ့ကို ပဲခူးကို ပို့ပါကွယ်
ရေထဲမြို့ကလေးက ညီလေး မောင်သက်ငြိမ်ရယ်
မင်းရဲ့ ကရင်ရွာက ဘုရားကျောင်းမှာ
ခေါင်းလောင်းသံလည်း မကြားရကြာပြီ
မင်းညီမလေးနဲ့ သမီးလေးကော နေကောင်းရဲ့လားကွာ
သော်ကဘုရားကြီးလည်း ဖူးချင်တယ်
ဝါခယ်မဘုရာကြီးနဲ့ ပြန်မလော့မြစ်မှာလည်း ရေချိုးချင်တယ်
လမုသီးလေးနဲ့ တောအရက်လေးကိုလည်း ဆန္ဒပြင်းပြင်းရှိတယ်
ပြန်မလော့မြစ်ရဲ့ နေ၀င်ချိန်လေးကို ရှူစားချင်တယ်
ယောင်္ကျားချင်းအချစ်နဲ့
ယောင်္ကျားချင်းအချစ် ရှိခဲ့တယ်ဆိုရင်
အဲဒီဗိုင်းရပ်စ်ပိုးကို ငါအရင်တွေ့ရှိခဲ့တာပါကွယ်။

မုံရွာက တင်ကိုကိုရေ
မင်းအရင်လိုအချစ်တွေ ငါ့အပေါ်ရှိသေးရဲ့လား
ငါလာခဲ့မယ်ကွယ်။

မုံရွာက အညာသားလေး မင်းဆွေနှစ်ရေ
မင်းရဲ့ စူပါရုဖ်ကားလေးနဲ့ ငါ့ကို
မုံရွေးကြေးမုံကို ပို့ပါကွယ်
အဲဒီမှာ ဆရာကြီးမှိုင်းရဲ့ တော်လှန်ကဗျာတွေ ရှိတယ်ကွဲ့
တော်လှန်ကဗျာဆရာကြီး
တော်လှန်သောကဗျာတွေ အပွင့်ဆန်း
ချောင်းနံဘေးမှာ အောင်ချမ်းသာ ဇီးသီးလေး ဘာလေး စားရင်း
သူများမကောင်းကြောင်း ကိုယ့်မကောင်းကြောင်း
ကမ္ဘာကြီးမကောင်းကြောင်းတွေ ပြောကြတာပေါ့ကွာ။

အနီးစခန်းက ညီလေး မြတ်ပေါ်ဦးရေ
မင်းရဲ့ ဂန္ဓာမာပန်းခြံထဲမှာ ဂစ်တာတစ်လုံးနဲ့
မာယာကော့စကီရဲ့ ကဗျာတွေရွတ်ရင်း
ကဗျာဆရာတွေ ကွယ်လွန်ရင်
ကဗျာနဲ့ သရဏဂုံတင်ရတယ်ဆိုတာ
ငါပြောခဲ့တယ်လေ
မင်းကောင်းကောင်း မှတ်မိမှာပါ။

ဒုဋ္ဌ၀တီမြစ်ကမ်းနံဘေးက
ကြွက်နဖားတောင်ကြီးရဲ့ နေ၀င်ချိန်က သိပ်လှတာပဲကွယ်
ကင်မရာမင်းလေး မောင်စိုးရဲ့
ကြွက်နဖားတောင်ကြီးရဲ့ နေ၀င်ချိန်တွေကို
မင်းရဲ့ အလှဆုံးရိုက်ချက်နဲ့ ရိုက်ခဲ့တယ်နော်
ငါကောင်းကောင်း မှတ်မိပါတယ်
နေ၀င်ချိန်တိမ်တောက်လို့
ပျိုကြောက်ပါတဲ့ ဒီအချိန်ဆိုသီကာ
လှည်းယာဉ်ကြော့လေးမောင်းလို့
တောသူမလေးရဲ့ ရင်သိမ့်တုန်သံမှာ
တို့ရဲ့ သောတာရုံမှာ
လွတ်လပ်ငြိမ်းချမ်းစေခဲ့တယ်နော်။

ကိုသန်းထွန်း(မုံရွာ) မီးရထားလမ်းနံဘေးက
လက်ဖက်ဆိုင် ကဖေးဆိုင်လေးမှာ
ရဲခဲ့ဘိ အစဉ်အလာနဲ့ အလံလွှင့်ထူ
ခင်ဗျားလက်နက်မချသေးဘူး မဟုတ်လား
ကျုပ်ဂုဏ်ယူတာ
ကုန်းဘောင်သူပုန် ဂဠုန်ဆရာစံ
ငုယင်ဗန်ထရွိုင်း
အတိုင်းမသိတဲ့ တိုက်ပွဲမှာ ခင်ဗျားပါဝင်ခဲ့တယ်နော်
ဗိုလ်အောင်ကျော်
အို … ဟယ်ရီတန်
စီးအန်ပွက်ပွက်
သင့်သွေးစက်သည်
ခေတ်သစ်ဆီကို ရော်ရည်နိုင်စေသတည်း။

မီးလိုပူကြွ ငါ့ရင်ဝက
တသခဲ့တဲ့ ကဗျာ
အို … ချိုးဖြူရယ် ကူပါ့သံတွေ
လူ့မြေလှပစေလော့
ငါ့ရင်ဝက တသခဲ့တဲ့ ကဗျာ
အော့ဇ၀စ်အကျဉ်းစခန်းက
ညီသူငယ်ချင်း တင်အေးကြူ (မောင်မှိုင်းလွင်)ရေ
ခင်ဗျားရဲ့ ချစ်သူ ညီမလေး ခင်မိုးကျော်
ရွက်ကြွေတောအုပ်နဲ့
မိချောင်းရဲ သုဿာန်လေးက စောင့်နေတယ်လေ
ခင်ဗျား လွမ်းသူ့ပန်းခွေချဖို့ ပြည်ကို လာခဲ့ပါဦး
နှလုံးသားနဲ့ တည်ဆောက်ခဲ့ရတာက
ခေတ်ရယ် ကမ္ဘာကြီးရယ်ပါ
ဒါပေမယ့်
ကမ္ဘာကြီးက ပြားပါတယ်ဗျာ။

ပင်လယ်ရေပြင် အမြင့်ပေ သုံးသောင်းကျော်က
ညီလေး မူးမူးရယ်
မင်း အနုပညာမှော်တွေ အောင်ခဲ့ပြီကွာ
မင်း ပထမကျော်တွေလည်း ရခဲ့ပြီကွယ်
သူငယ်ချင်း မင်းသစ်ရယ် ရှယ်လီထွားရယ်
ကျနော်တို့တတွေ ဂစ်တာလေးတစ်လုံးနဲ့
ကျနော်တို့တွေ ဂစ်တာတီး တေးဆိုကြမယ်ဗျာ
ဤအိမ်တော်မှာ ကောင်းခြင်းမင်္ဂလာ ပြည့်စေသတည်း
ဤအိမ်တော်မှာ ငြိမ်သက်ခြင်းလည်း ရှိပါစေပေါ့
ပျော်ရွှင်ခြင်းလည်း ရှိပါစေပေါ့။

တောင်သမန်အင်းက လေညင်းရယ်က ဆော်
အစ်ကိုကြီး ကိုလေး (အင်းဝဂုဏ်ရည်) ရယ်
မောင်ပေါက်စည် (မန်းတက္ကသိုလ်) ရယ်
အိုင်ဗင်နော့ရယ်
ကျနော်တို့တတွေ တောင်သမန်အင်းမှာ
ငါးကြော်နဲ့ ထမင်းစားကြမယ်
ပြီးရင်
ဟောဒီလို တေးသီကြမယ်ဗျာ
“ငါသည် မှန်သော စပျစ်နွယ်ပင်ဖြစ်သည်
ငါ့ခမည်းတော်သည် ဥယျာဉ်မှူးဖြစ်ဖူးပြီး
အသီးမသီးသော အခက်ရှိသမျှ ခုတ်မည်တည်း
အသီးသီးသော အခက်တို့သာ တည်စေသော်မူသတည်း”
သုံးကြိမ်သုံးခါ ဆိုပြီးသကာလ
ငါးကြော်နဲ့ အင်းဘေးမှာ
ထမင်းကြော် လွေးကြတာပေါ့ဗျာ။

သူငယ်ချင်း သုခမိန်ရေ
သီချင်းရဲ့ လပေါ်က ဘီယာဆိုင်ကို သွားကြမယ်
အဲဒီမှာ
တောအရက် ငါးပုလင်း
တောဆိတ်သား ငါးကောင်
ငါးကင်၊ ဒိန်ခဲ၊ ကြက်ကင်နဲ့
ကဗျာတွေ ရွတ်ဖတ်သရဇ္ဈာယ်ကြမယ်
ပျော်တယ်ဗျာ
ညီမလေး မမမြင့်ရယ် မောင်နှမလို နေကြမယ်ကွယ်
ခေါ်မယ်နော်
အစ်ကိုနဲ့ အစ်မတွေကို ခေါ်မယ်
ညီနဲ့ ညီမတွေကို ခေါ်မယ်
အားလုံးပဲ ပျော်ကြမယ်
ငြိမ်းချမ်းရေး ငြိမ်းချမ်းရေးပွဲတော်
အစ်ကိုတို့ရေ အရပ်ကတို့ရေ
ဘုရားဒကာပါဘုရား
သနားမညှာတာ မလုပ်လိုက်ပါနဲ့
ဘုရားဒကာပါဘုရား
ဒုက္ခိတနဲ့ နာတာရှည်ပါဘုရား
သနားမညှာတာ မလုပ်လိုက်ပါနဲ့
တောင်စွယ်နေကွယ်ရင်ကွယ်
ရွှေဓားဆွဲကာ သတ်မယ်တဲ့
တကယ်ပါပဲဗျာ
လူ့ဘ၀ကြီး အကြီးအကျယ် မုန်းစရာ
ကျုပ်ဖြင့် အလွန်မုန်းသဗျာ
အာဂျန်းဆိုတဲ့ သွားအဖွေးသားနဲ့
ငါ့ကလေးလေးရေ
မင်းဟာလေ နတ်သားလေးပါပဲကွယ်
ညီမလေး မမမြင့်ရေ
မမြဲတဲ့ အနိစ္စတရားက မြဲလွန်း
တို့တွေ ရှူံးလွန်းလှတယ်ကွယ်
ညီမလေး မမမြင့်ရေ
လေးစားပါတယ် ဂုဏ်ယူပါတယ်။

(ခ)

ငါဖွဲ့ဆိုစပ်သီတဲ့ ကဗျာလေးတွေသာ သီဆိုပါ
သုခစာပေတိုက်က ညီလေး မောင်သီဟရေ
မင်းဟာ ကေသရာဇာပါ
ငါ့ကဗျာလေးတွေကို မျှဝေခံစားကြပါ
မြို့သစ်က တိုးနှောင်မိုးလေးရယ်
မောင်စွမ်းသာ
ကောင်းဟန်
မိုးသောက်ကြယ်ရယ်
ငါတို့တွေ အိမ်ရှေ့မင်းထန်းတောမှာ
ဗယာကြော် စားသုံးရင်း ဘေးဘယာတွေ ကျော်ရမှာပေါ့
နာကျင်တာ ဒဏ်ရာပေါ့
ဒဏ်ရာဆိုတာ ကဗျာ
ဒဏ်ရာဆိုတာ သစ္စာတရား
ဒဏ်ရာဆိုတာ ချစ်ခြင်းမေတ္တာ
လောကကြီးကိုတော့
ဥပေက္ခာရေပိုင်နက်ထဲမှာ
ငါးမန်းစာကျွေးတာပေါ့
အ၀ိဇ္စာဆိုတာ အင်မတန် ခွန်အားရှိလေရဲ့
သူတို့တတွေ ဆာလောင်နေကြပြီ။

ပဲခူးမြရေ
မြကလေးရဲ့
ရှိုးပြပြတယ်လို့ မဖြစ်ချေဘူး
ပျိုးချသမျှဟာလည်း
ပိုးကျလို့နေချေပေါ့
ကဗျာဆရာ ဒီလန်သောမတ်တို့
ကန်မ်တာကလော့တို့
ဆယ်ဗယ်ယာပလပ်တို့
တက်ဒ်ဟုခ်ျတို့
ရှေးမတ်စ်ဟေနီတို့
အော်ဒင်တို့
မင်းတို့ကလည်းကွာ
ယောင်္ကျားဧကန်စစ်စစ် ဖြစ်လျက်သားနဲ့
ဖင်လေးရတယ်
ဂျွန်အံဒင်းဗားရေ
မင်းရဲ့ ချစ်သောမြစ်ကြီးရော
ကျန်းကျန်းမာမာပဲ မဟုတ်လား
ငါကတော့ ဆီမီးခွက်လောက်ရှိတဲ့
တိုင်းငယ်ကလေးက ကဗျာဆရာပါ
သူရသတ္တိ ကြီးမားလှစွာ
နေပူလေပူမှာ ခြေပူခံရင်း
အထူးထူး ဆန်းပြားသော ကဗျာတွေ စပ်လို့ပေါ့
ဗင်းနစ်မြို့သား ကုန်သည်ကြီးရေ
မင်းနဲ့ငါ ပြဇာတ်သွားကြည့်ကြတာပေါ့။

ပျဉ်းမနားသား ကဗျာဆရာလေး ကိုသက်ရေ
ဝီလျံလင်းရေ
ကဗျာတွေ စာတွေဖတ်ဖို့
ကျုပ် ပြည်ကိုလာဦးမယ်
ကျနော့်ကို နှစ်အစိတ်လောက်
ထောက်ပံ့ခဲ့တဲ့ ခင်ဗျားကို
ကျုပ်ရဲ့ မြကျွန်းတက္ကသီလာကြီးလည်း
နှစ်ရှစ်ဆယ် အရွယ်ရောက်ခဲ့ပါပြီဗျာ။

ညီမလေး မမမြင့်ရေ
မောင်နှမလို နေကြမယ်
အနုပညာငှက်ကလေး ပျံတော့မယ်
မပျံနိုင်သေး ညီမလေး
ညီမလေးရယ်
တောပွဲလေးမှာ ဆွေးရဦးမယ်
ရှင်ဥတ္တမကျော် ရွှေစက်တော်တောလား
ရတုဘုရင် နတ်သျှင်နောင် ပြည်န၀ဒေး
နှမလက်လျှော့
နေလေတော့ဟု
ချစ်ခွင့်မကြုံ
ညှိုးငယ်ရုံမျှ
‘ငှက်သွင်ပျံကြွ မတတ်သော်’တဲ့
မပြန်နိုင်သေး
ညီမလေးရယ်
မပြန်နိုင်သေး
တောပွဲလေးမှာ
ဆွေးရဦးမယ်ကွယ်
ပလိပ်မြို့ မြွေဘုရားပွဲမှာ
(မြိတ်)ဘိတ်မြို့ ညီငယ်ကဗျာဆရာလေး
ရဲဘုန်းခေါင်ရေ
မင်းကတော့ ဘိတ်အကျဆုံး
မကြာမတင်မှာတော့
မကြာခင်မှာတော့
မင်းရဲ့ မင်္ဂလာဖိတ်စာရယ်
ငါဖတ်ရမှာပါကွာ။

သားလေးကို အားပေးပါဦးကွယ်
ကန့်လန်ကာကြီးရယ် နေပါဦး
ကလို့ကောင်းနေတုန်း
ရွာစာကြီးရယ် တီးလိုက်ပါဦး
ဆိုလို့ကောင်းနေတုန်
မိုးမိုးချစ်လို့လား
မိုးမိုးလှလို့လား
ညီလေးမိုး ကျန်းမာပါစေ
မေတ္တာဖြင့် မောင်ချောနွယ်

အေးကွာ မင်းတို့ညီအစ်ကိုနဲ့ အေးစေတီဘုရားပွဲမှာ ကခဲ့တာတွေရော၊ ရွှေစည်းခုံဘုရားပွဲမှာ ကခဲ့တာတွေရော ပြန်လည်လွမ်းမောမိပါတယ်။ မင်းတို့လည်း ကောင်းခဲ့ပါတယ်။ ငါလည်း ကောင်းခဲ့ပါတယ်။ ခုဆို ကွဲကွာနေရတာလည်း ကြာလှပြီပေါ့နော်။ ချစ်ခြင်းမေတ္တာတွေ စီးလျက်သာတည်းပါကွာ။ တေးသီငှက်တွေ သီမြဲပါကွယ်။ ပန်းသစ်လေးတွေ သစ်မြဲပါကွယ်။ ပန်းဆိုတာ ကြွေတာကိုက ပွင့်ခြင်းပါ။ One flower flow down flower blossom ပေါ့လေ။ ပန်းတွေ ပန်းတွေ အရမ်း အရမ်းပဲ ပွင့်နေကြတယ် ညီမလေး မမမြင့်ရယ်။ အိမ်မှာ ကျောင်းမှာ လမ်းမှာ ညီမလေး နာမည်နဲ့ အရမ်း အရမ်းကို ပွင့်နေကြတယ်ကွယ်။ ကိုယ့်အသည်းကို အာထရာဆောင်း ရိုက်ကြည့်တော့ ပန်းပွင့်လေးနာမည်က ညီမလေး မမမြင့်တဲ့ …။

မောင်ချောနွယ်
(ခေတ္တ - စိတ္တဇဆေးရုံ)

အပြည့်အစုံသို့...

ပြန်ခေါက်ထားပါ...

Posted by ဒေါက်တာလွဏ်းဆွေ at 11:24 AM 0 comments

Labels: မောင်ချောနွယ်ကဗျာ